БИШКЕК, 19-авг. — Sputnik. Чычкан капчыгайында дагы деле өчпөй жаткан өрттү өчүрүүгө жалпысынан учурда 500гө жакын кызматкер катышып жатат. Жаңы-Жол айыл аймагынан 10 атчан киши өрт өчүрүүгө катышкандарды тамак-аш менен камсыз кылууда. Бул туурасында ӨКМдин маалымат кызматы билдирди.
Чычкан капчыгайында өчпөй жаткан өрттүн башка аймактарга жайылып кетүү коркунучунан улам, ӨКМдин Чүй, Талас, Жалал-Абад облустарындагы жана Бишкек шаарынын өрткө каршы кызматынан кошумча күчтөр тартылган.
"Министрликтин Бишкек, Ош, Таш-Көмүр шаарларындагы, Жалал-Абад, Талас облустарындагы өрт өчүрүү жана куткаруу кызматтарынан да кошумча 200дөн ашык кызматкерди жөнөтүү миледти министрдин орун басары, полковник Толкунбек Молдокеевге тапшырылды",— деп билдирди ӨКМдин маалымат кызматынан.
ӨКМдин маалымат кызматы 2015-жылдын 14-августунда өрт чектелип, бирок дарактардын дүмүрлөрү чым болуп, толук өчпөй түтөп, шамал болгон сайын кайра тутанып кетүү коркунучу жаралып жаткандыгын айтты.
