БИШКЕК, 11-авг. — Sputnik. БШК аймактык шайлоо комиссиясынын мүчөлөрүнө күздө боло турган шайлоо жөнүндө бир катар окууларда өткөрөт. Бул тууралуу Борбордук шайлоо комиссиясы билдирди.
Өлкө башчысынын жарлыгына ылайык, парламенттик шайлоо ушул жылдын 4-октябрына дайындалган. Расмий үгүттөө иштери 4-сентябрдан тарта башталат.
Окутуу жалпы шайлоо процесси жана автоматтык түрдө санаган урналарды колдонуу боюнча эки багытта жүргүзүлөт.
Баткен, Ош, Жалал-Абад облустарынын өкүлдөрү үчүн окуулар 11-14-августта Ош шаарында, ал эми Чүй, Талас, Нарын жана Ысык-Көл облусундагы аймактык шайлоо комиссиясынын мүчөлөрүнө 17-20-августта Бишкек шаарында болот.
Окууга өлкө аймагынан 120 талапкер тандап алынган. Окуудан өткөн өкүлдөр аймактык шайлоо комиссиясынын башка мүчөлөрүнө көрүп-билгендерин үйрөтөт.
