БИШКЕК, 6-авг. — Sputnik. Жүрөк хирургиясы жана органдарды трансплантациялоо илимий изилдөө институтунун директорунун орун басары жана кардиология бейтапканасынын кызматкерлери ири өлчөмдө пара алып кармалганын ИИМ билдирет.
1 Баш оона 2015, 09:35
Маалыматка ылайык, Түркиядан атайын келген дарыгерлердин жүрөккө акысыз операция жасап жатканына карабастан, аталган мекеменин жетекчисинин орун басары жана кардиология бейтапканасынын кызматкерлери Ош облусунан келген оорулуудан операция үчүн 120 миң сом талап кылышкан. Туугандары 114 миң сом чогултуп берсе да, акча сураган көлөмдө болбогондуктан, оорулууга бир ай бою операция жасалган эмес. Ооруканадан чыккандан кийин ал айылына жетпей каза болгон.
Пара аталган институттун жана бейтапкананын бир катар кызматкерлеринин колунан өткөн. Ал негизинен медайымдар аркылуу алынган.
Аныкталган факт боюнча Башкы прокуратуранын тергөө башкармалыгы тарабынан "пара талап кылуу", "пара алуу" беренелеринин негизинде кылмыш иши козголду.
Иликтөө иштеринин натыйжасында алгач акча алган медайым кармалып, андан кийин буга тиешеси бар башка кызматкерлер колго түшкөн.
Учурда тергөө иштери жүрүп жатат.
