БИШКЕК, 29-июль — Sputnik. ФМК башкармалыгынын алдындагы чет элдик жарандарды убактылуу кармоочу жайда отурган кыргызстандык Каныбек Мусаев сот чечими менен депортациялана турганын Sputnik агенттигине аталган мекеменин жетекчиси Александр Холодков билдирди.
Шейшемби күнү Якутиядагы кыргыз диаспорасы аталган мекемеде кыргызстандык жарандын аёосуз сабалганы тууралуу айтып, маалыматта ага эч кандай медициналык жардам көрсөтүлбөй жатканын кабарлаган.
Холодковдун айтымында, маалымат чындыкка дал келбейт.
"Кыргызстандын жараны Мусаевди Федералдык миграция кызматынын өкүлдөрү сабаган эмес. Ал мекемеден өзбекстандык жаран менен качып чыгып сегиз күндөн кийин кармалган. Өзүн устара менен кесип жарадар кылам деп коркуткан. Мындан улам, ФМК тарабынан коопсуздук иш-чаралары көрүлгөн", — деди Холодков.
Ал Мусаев жакын арада өз документтери менен Россиядан депортациялана турганын белгилеп, аталган документтерди көрсөтүүдөн буга чейин баш тартып келгенин кошумчалады.
"КР жараны кыргыз диаспорасынын өкүлдөрү менен жолукту. Алар айтылгандын баарын тастыктап беришет. Медициналык жардам көрсөтүлдү. Окулистте болуп, ден соолугун калыбына келтирүүчү дарылар берилди", — дейт жетекчи.
Sputnik агенттиги менен болгон сүйлөшүүдө кыргыз диаспорасынын мурунку жетекчиси Эсен Сайдыкулов Мусаев буга чейин Кыргызстанда соттолгону, бул ага карата чара көрүүдө терс таасир эткенин айтты.
"Каныбек Мусаевге өзүн жакшы алып жүрүү керектигин түшүндүргөндөй болдум, тил алууга убада берди", — деди Сайдыкулов.
Ал Мусаевдин тегерегиндеги ызы-чуу көңүл бурууга арзыбай турган нерсе экенин белгиледи.
"Бизде диаспора ич ара бөлүнүп жатат. Экинчи топтун лидери Данияр Байгуттуев Мусаевдин аркасы менен өзүнө көңүл бурдурууга аракет кылууда", — деди диаспоранын мурунку жетекчиси.
Окуянын дагы бир катышуучусу, Якутиядагы кыргыз диаспорасынын учурдагы башчысы Данияр Байгуттуев уюм ичиндеги бөлүнүп-жарылуулар бар экенин жашырбайт. Муну менен катар ал Сайдыкулов Якутия боюнча ФМК кызматкерлери менен сүйлөшүп алган деп эсептейт.
"Алардын байланышы күчтүү. Сайдыкулов аткаминерлерди жактап, мекендешибиз тууралуу кам көрүүдөн баш тартты", — дейт Байгуттуев.
Якутия боюнча ФМК башкармалыгынын жетекчиси Александр Холодков бардык маалымат Якутиянын тергөө комитетине экенин жана Кыргызстандын Новосибирск шаарындагы консулдугуна жөнөтүлгөнүн билдирди.
