БИШКЕК, 29-июль — Sputnik. Президент Алмазбек Атамбаев бүгүн Малайзиянын ири жалпыга маалымдоо каражаттарынын өкүлдөрүнө интервью берди. Бул туурасында президенттин маалымат кызматы билдирди.
Мамлекет башчысы Кыргызстандын инвестициялык жана туристтик мүмкүнчүлүктөрү, Евразиялык экономикалык биримдикке мүчөлүгүнүн алкагындагы КРдин негизги багыттары, өлкөнүн ар кыл тармагында жасалып жаткан реформалары тууралуу айтып берди.
Атамбаев журналисттердин Кыргызстан менен Малайзиянын ортосундагы мамилелердин абалы, келечеги, аларды өнүктүрүү жана кеңейтүү багытындагы суроолоруна да жооп берди.
Мамлекет башчысы эки тараптуу мамилелерди, биринчи кезекте соода-экономикалык жана инвестициялык чөйрөлөрдөгү алаканы күчөтүү зарылдыгын белгиледи. Интервью Малайзиянын "Bernama" мамлекеттик маалымат агенттигинин, "BernamaTV", "News TV" телеканалдарынын жана "The Star" аттуу ири медиатоптун журналисттери үчүн уюштурулду.
