БИШКЕК, 21-июль — Sputnik. Суруч шаарында болгон жардыруудан Кыргызстандын жарандары жабыркабаганын КРдин Анкарадагы консулу Айбек Акаев Sputnik сайтына билдирди.
Дүйшөмбү күнү, 20-июлда Түркиянын Шанлыурфа аймагындагы Суруч шаарында болгон жардыруудан отуздай киши өлүп, жүздөн ашык киши жаракат алган.
Акаев жардыруудан жабыркаган кыргызстандыктар тууралуу маалыматтар такталып жатканын билдирген болчу. Бүгүнкү күнү жаракат алган кыргызстындыктар жок экенин ал белгиледи.
"Түркиянын Ички иштер министрлиги менен байланышып жатабыз, Суруч шаарында болгон жардыруудан Кыргызстандын жарандары жабыр тарткан жок", — деди Акаев.
Анын айтымында, аталган шаарда жашаган кыргызстандыктар бар, бирок, алардын так саны жок.
Ал эми премьер-министр Ахмет Давутоглу алдын ала маалыматтарга ылайык, "Ислам мамлекети" (ИМ) террористтик тобу Түркиянын түштүк-чыгышында орун алган Шанлыурфа провинциясынын Суруч шаарында болгон терактка тийиштиги бар экенин айткан.
Түркиянын Суруч шаары Сирия менен чектешкен аймакта орун алган.
