БИШКЕК, 21-июль — Sputnik. Алдын ала маалыматтарга караганда, "Ислам мамлекети" террордук тобу Түркиянын түштүк-чыгышында орун алган Шанлыурфа провинциясынын Суруч шаарында болгон терактыгажооптуу деп билдирди дүйшөмбүдө Түркиянын премьер-министри Ахмет Давутоглу.
Сирияга чектеш жайгашкан Суручтун маданий борборунун жанындагы чайканада болгон терактыда 30 адам курман болуп, 100дөн ашыгы жаракат алган.
Бомба түркиялык күрддөр чогулган маданий борбордун кире беришинде жарылган. Күрддөр "Ислам мамлекети" тобунун согушкерлери жабыр тарткан Кобани шаарын кайра калыбына келтирүү үчүн Сирияга барууга камынып жатышкан.
"Муну "Ислам мамлекети" жасаганын кылмыш болгон жерден алынган алгачкы далилер көрсөтүп турат. Чыккынчылар "тирүү бомбаны" пайдаланышкан. Жан кечтинин ким экени азырынча аныктала элек. 30 адам каза таап, 104 адам жарадар болду, 43 киши ооруканаларда, алардын 9у реанимацияда", — деди Давутоглу дүйшөмбүдө өткөн маалымат жыйынында.
Мурдараак Түркиянын президенти Режеп Тайип Эрдоган курман болгондордун үй-бүлөлөрүнө көңүл айткан. Окуя болгон жерге өлкөнүн вице-премьери Нуман Куртулмуш, ички иштер министри Себахаттин Өзтүрк, эмгек жана коомдук коопсуздук министри Фарук Челик келген.
