БИШКЕК, 21-июль — Sputnik. Мыйзамсыз менчиктештирилип кеткен бала бакча имараттарынын 72 пайызы мамлекетке кайтарылганын Билим берүү жана илим министри Элвира Сариева 2015-жылдын биринчи жарым жылдыгынын жыйынтыгы боюнча өткөн коллегиянын жыйынында билдирди.
Анын айтымында, лицензия берүү процессинин жеңилдеши менен менчик бала бакчаларынын саны көбөйдү.
"Бул бала бакчалардын көбү буга чейин эле иштеп келген. Бирок лицензия алуу шартынын татаалдыгынан улам каттоодон өткөн эмес. Учурда лицензия алган бала бакчалардын теңи — жаңы мекемелер. Лицензия берүү процессинин жеңилдеши оң таасирин берип жатат", — деди Сариева.
Мындан тышкары, министр оңдоого муктаж мектептердин маселеси татаалдыгына карабай, чечүүгө боло турганын белгиледи.
"Быйыл курулушу эчак башталып бүтпөй турган 230 объектини аягына чыгаруу каралган. Дагы 200 имарат кезекте турат, жакын арада бул маселе да чечилет. Авариялык абалдагы мектептер узак жылдар бою ремонттон өткөн эмес. Азыр аларды оңдоонун ордуна жаңы имарат куруу жеңил болот", — деди Сариева.
Министрдин билдирүүсүндө кабыл алынган мамлекеттик программанын негизинде жыл сайын реконструкцияга муктаж 200 мектеп, ошондой эле жаңы курула турган мектептердин саны аныкталат. Мындан улам ошол эле көлөмдөгү каражат менен алда канча көп мектепти ремонттон өткөрүү каралган.
