БИШКЕК, 15-июль — Sputnik. Тергөө иштери аяктамайын пара алууга шектелип кармалган Жогорку Кеңештин депутатынын кайда экенин УКМК азырынча ачыкка чыгарбайт.
Маалыматка ылайык, ЖК депутаты Х.К. 100 миң доллар өлчөмүндө пара алып жаткан жеринен кармалган. ЖК депутаттарынын тизмесинде "Х.К" инициалына Хажимурат Коркмазовдун аты-жөнү туура келет. Эл өкүлү "Реформа үчүн" депутаттык топтун курамында турат.
УКМК мыйзам боюнча сот 48 сааттын ичинде кармалган адамдын баш коргоо чарасын аныкташы керектигин белгилейт.
Ошону менен бирге жалпыга маалымдоо каражаттарында алдын ала маалыматтар боюнча экс-депутат Түлеевдин үй-бүлөсүнөн пара талап кылганы үчүн президенттин аппарат жетекчиси кармалганы тууралуу айтылган. Бирок президенттин маалымат катчысы Жанар Акаев бул кабарды четке каккан.
