Майрамкул Асаналиев тайганчылык менен 19 жылдан бери алектенип келет. Таза кандуусун издеп барбаган жери калган эмес. Учурунда Кыргызстанды түрө кыдырып жүрүп, Таластын Кызыл-Чарба айылында "репрессиядан" аман калган бир тайганды таап алып, ошондон тукумун улаган.
"Бул өнөргө кызыгып алсаң, үй-жайың, оокат-ташыңдын баары калат экен. Анын үстүнө жаштыктын деми менен да бир топ фанат болуптурбуз. Өлөр-тирилериме карабай тайган артынан жүргөнүм жүргөн болчу", — дейт Асаналиев.
Майрамкул байкенин дагы бир негизги көйгөйү — тайгандарынын уурдалышы. Уурдай берип жанын койбой койгондо айласыздан тайгандарынын көбүн ар кайсы жакка таратып, бирөөлөргө бактырууга өткөн.
Марга жетүү үчүн улам асылдандырып отуруп 10 жылдай убакыт корогон. Мар жетинчи төлдөн жаралган тайган. Учурда Кыргызстанда таза кандуу тайгандын күчүктөрү 200 доллардан жогору, ал эми өзү 80 миң сомдон өйдө бааланат.
