БИШКЕК, 10-июль — Sputnik. Саламаттык сактоо министрлигинин кардиология борборунда кыргыз-индиялык телемедицина борборунун жана тоо биомедицина илимий борборунун илимий изилдөө долбоорунун салтанаттуу ачылышы өтөрүн мекеменин маалымат кызматы билдирет.
Долбоордун алкагында телемедициналык диагностикалык пункттардын түйүнү түзүлөт. Бишкек шаарында, Ош, Ысык-Көл жана Талас облустарындагы улуттук борборлор келечекте индиялык медицина борборлору менен өз ара байланышты камсыздап берет.
Мындан тышкары, кыргызстандык саламаттык сактоо өкүлдөрү үчүн дистанциялык курстар жүрөт.
"Бул долбоор калктын саламаттыгына кам көрүүнүн сапатын бир топ жакшыртат, алыскы аймакта жайгашкан оорукана же ФАП эл аралык деңгээлдеги адистен кеңеш алууга, оорулардын жайылышына бөгөт коюуга, кесипкөйлүктү жогорулатууга кеңири мүмкүнчүлүк берет", — деп айтылат билдирүүдө.
Долбоор 2015-2019-жылдарга каралган. Индиялык тарап аталган илимий изилдөө үчүн болжол менен бир миллион АКШ долларын бөлө турган болду. Мында деңиз деңгээлинен 4000 метр бийиктикте жайгашкан тоолуу аймактарда илимий станциянын курулушу да бар.
