БИШКЕК, 26-июнь — Sputnik. АКШ элчиси менен Кыргызстанда ЮСАИД тарабынан жүргүзүлүп жаткан сот реформасынын долбоору талкууланганын Sputnik кабарчысына "Прецедент" өнөктөштүк тобунун жетекчиси Нурбек Токтакунов коомдук бирикменин кеңсесинде өткөн жолугушуунун видеотасмасы жөнүндө комментарий берип жатып билдирди.
Токтакуновдун өзүнүн айтымында, америкалык дипломат менен жолугушуу 18-июнга пландалган болчу. Бирок эки тараптын тең колу бошобогуна байланыштуу кийинкиге жылган. Жолугушуу жарым сааттан ашкан жок.
Токтакунов жолугушууга анын сот реформасынын долбооруна карата айткан сын пикири себеп болгон.
"Мен сот реформасы боюнча ЮСАИДдин жасагандарына сын ойлорумду айткам. Алар, мисалы, каражаттардын натыйжасыз бөлүнүшү, Кыргызстандагы жагдайды туура эмес түшүнүүдөн акча жөн эле ысырапталышы жөнүндө болчу. Элчи иштин абалы менен таанышып, менин сын пикиримдин маңызын билүүгө келди. Ал сот реформасы боюнча донорлордун иши жөнүндө менин оюмду укту. Айткандарым ЮСАИДге гана эмес, биздин өкмөт менен сот реформасын ишке ашыра албай калган бардык донорлорго тийиштүү болчу", — дейт укук коргоочу.
2015-жылдын февраль айында АКШнын Кыргызстандагы убактылуу элчиси болуп Ричард Майлз дайындалган. Ал элчилик милдетти Азербайжан, Сербия жана Болгария мамлекеттеринде да аркалаган. 2003-жылы Грузияда "роза төңкөрүшү" болгон учурда да Майлз аталган өлкөдө Американын элчиси болуп турганы белгилүү.
