БИШКЕК, 26-июнь — Sputnik. Өткөн жылы Бишкектеги көп кабаттуу үйлөрдүн биринин короосун жасалгалагандан кийин шаар тургуну Анна Волкова парламенттин полиэтилен баштыктарын колдонууга тыюу салуу демилгесин колдой турганын билдирди.
Волкова Ахунбаев көчөсүндө жайгашкан турак үйдүн короосун пластик бөтөлкө жана унаа дөңгөлөктөрү менен кооздоп, балдар ойной турган жайды таза, ыңгайлуу аянтчага айлантканы менен белгилүү болгон. Өткөн жылы "таштандыдан" жаныбарлардын жана өсүмдүктөрдүн келбетин жасаган. Короону жасалгалоо үчүн жалпысынан миңдей бөтөлкө жана он чакты дөңгөлөк керектелген.
Парламент тарабынан демилгеленген полиэтилен баштыктарын пайдаланууга тыюу салууну Волкова колдойт. Анын айтымында, "бул керектүү мыйзам". Эгер ал кабыл алынбаса, таштандынын кесепеттерин небере-чөбөрөлөр тартышы мүмкүн.
Бөтөлкөлөрдөн фигура жасоо тууралуу ой эшикте ойноп жүргөн баласына камтама болуп жатканда пайда болгон.
"Бул жер унаа токтотуучу жайдан бетер бардыгы машинелерин токтотуп коюшат. Кичинекей балам унаалардын жанында ойногону мени тынчсыздандырчу. Короого алгач бир дөңгөлөктү жайгаштырдым, анан уланып кетти", — деп эскерет Волкова.
Ал дөңгөлөк менен бөтөлкөнү баарылап издегенин айтат. Мындан тышкары, анын колунан чыккан буюмдар эстетикалык ырахат тартуулап тим болбостон, шаардыктарды тазалыкка да үндөп турат.
"Өткөндө короодо мастар отуруп алып ичип жатышты. Бөтөлкөсүн таштап кетип баратышты эле, бирөөсү кайрылып, аны таштанды салчу үкөккө салып кетти. Бул менин кичинекей ийгилигим деп эсептейм", — дейт Волкова.
Шаршемби күнү Жогорку Кеңеш полиэтилен баштыктарын өндүрүүгө, импорттоого жана сатууга тыюу салуу каралган мыйзам долбоорун биринчи окууда колдоп берди. Ага ылайык, мыйзам бузган жарандарга 200-500 сом, ал эми юридикалык жактарга 500-1000 сом өлчөмүндө айып пул салуу каралган.
