БИШКЕК, 9 июня — Sputnik. Достук мамилелери илгертен эле адамдар ортосундагы бийик руханий жана социалдык баалуулук катары саналып келген. Адамдардын баары эле достору менен мактанып, алар менен чогуу өткөргөн бактылуу көз ирмемдер тууралуу айтып бере алышат. Достук тууралуу көп нерсе айтууга болот. Негизгиси, достук – бул адам жашоосундагы бирден бир маанилүү мамиле экени анык.
Майрамга карата Sputnik кабарчысы достуктун мааниси жана ага байланыштуу жагымдуу көз ирмемдерди айтып берүү өтүнүчү менен замандаштарыбызга кайрылган.
Авланбек Жумабаев, медиа-менеджер:
Адамдар бири-бирине же туугандыгы, же достук жана сүйүү аркылуу жакындашат. Мен үүчүн достук сүйүүгө караганда маанилүүрөөк. Анткени, достор менен ошол эле сүйүү жөнүндө да сүйлөшө аласың…
Айжан Сырдыбаева, кол өнөрчү:
Достуктун мааниси абдан чоң. Бул жан дүйнөнүн, кызыкчылыктардын жакындыгы. Достошуу — бул жакындарың менен ой-толгооңду бөлүшүү, аларга жагымдуу ирмемдерди тартуулоо. Бул — адамга болгон чексиз ишеним. Досторум менен болгон мамиле мен үчүн абдан баалуу, анткени, аны акчага сатып ала албайсың.
Игорь Шестаков, саясый баяндамачы:
Мен Новосибиркиде жаштар гезитинде иштеп, жазган жаңылыгыңды бүтүндөй дүйнө окуп жатканын элестете алчу эмесмин. Анда мен 24 жашта элем. Досум “Интерфакс” агенттигине орношуума жардам берип, дүйнөлүк ЖМКдан чочулабаш керектигин айтты. Тескерисинче, алдыга умтулуп, өз күчүмдү текшерүүгө ынандырды. Ал өзүңө ишенгенде гана жакшы жыйынтык чыгарын кулагыма куюп жүрдү. Чын эле, азыр баары жайында.
Анара Мамытова, журналист:
Достук — бул дүйнөдө сени түшүнүп, керек учурда жардам берип, ийгиликтериңе чын дилден кубана турган адам бар экенин сезип-билүү. Алар сенин оюңду туура көрбөсө да, аны сыйлайт, кыйын кезде колдоосун аябайт. Сен аны менен күнүгө чалышып же күн алыс көрүшүп турушуң зарыл эмес.
