БИШКЕК, 22-май — Sputnik. Июнь айында Бишкекте "Борбор Азиядагы миграция маселелери" аттуу эл аралык конференция өтүп, анда аталган аймактагы миграциянын түйүндүү маселелери талкууланат. Бул туурасында Жогорку Кеңештин маалымат кызматы билдирди.
Анда Борбор Азия жана КМШ мамлекеттеринин миграция жаатындагы, анын ичинде эмгек мигранттарынын, качкындардын, жарандыгы жок адамдардын укуктарын коргоо боюнча талкуу болот.
"Киши сатууга каршы күрөшүү боюнча улуттук мыйзам жоболорун укуктук жактан колдонуу жана өркүндөтүү жаатында эл аралык байланыштарды жана кызматташтыкты күчөтүү маселелери да негизги темалардан болот", — деп айтылат маалымат кызматы тараткан билдирүүдө.
Конференциянын катышуучулары экстремизмге, терроризмге, коррупцияга, наркобизнеске, эл аралык уюшкан кылмыштуулукка каршы күрөш жаатындагы кызматташтыктын келечеги туурасында пикир алышмакчы.
