БИШКЕК, 18-май — Sputnik. Кыргызстан менен Казакстандын, анын ичинде ЕАЭБдин башка өлкөлөрү менен чек аралары күздөн эрте ачылбайт деп билдирди "Ата Мекен" фракциясынын жыйынында экономика министри Олег Панкратов.
8-майда Евразиялык экономикалык биримдиктин биринчи саммитинде Кыргызстандын аталган интеграциялык уюмга кирүүсү боюнча акыркы документтерге кол коюлган.
Жума күнү Кыргызстандын ЕАЭБге кириши боюнча документтердин толук пакети Жогорку Кеңештин кароосуна 18-майда алынып чыгылаарын өкмөттүн отурумунда экономика министри Олег Панкратов кабарлаган.
Панкратовдун айтымында, 8-майда Москвада документтерге кол коюп жатканда бир нече чечимдер кабыл алынган.
"Алардын бири Кыргызстан менен Казакстандын ортосундагы бажы чек араларын жоюу боюнча маселеге тиешелүү. Анда бажы көзөмөлү тиешелүү келишим күчүнө киргенден тарта алынаары, тактап айтканда, документти ЕАЭБге кирген бардык өлкөлөр ратификациялагандан кийин алынаары айтылган", — деп билдирди министр.
Министр ратификация мөөнөтүн так айтуу азырынча кыйыныраак болуп жатканын, андыктан күзгө карата божомол түрдө айтып жаткандыгын кошумчалады.
