БИШКЕК, 30-мар. — Sputnik. Centerra Gold Inc компаниясынан келген делегация менен кыргыз тараптын бир жумадан бери болуп жаткан сүйлөшүүлөр уланууда.
"Биринчиден, экология маселеси, андан сырткары экономика жана юридикалык маселелер каралууда. Канададан алардын юристтери, экологдору, финансы эксперттери келген. Кыргызстан тараптан тиешелүү министрликтер менен ведомстволордун өкүлдөрү, өкмөт жалдаган АМЕКтен сырткары дагы эки чет элдик компаниялардын эксперттери катышып жатат", — деп билдирди "Кыргызалтын" ААКтын жетекчиси Токон Мамытов.
Өкмөт сүйлөшүүлөрдүн жыйынтыгын парламентке келерки аптада алып бармакчы. Бул туурасында өкмөт башчысы Жоомарт Оторбаев журналисттерге билдирди.
"Парламенттин токтомунда сүйлөшүүлөрдү бул жуманын дүйшөмбүсүндө аягына чыгаруу белгиленген. Бул аптада делегация менен сүйлөшүүлөр жүрүп, бир канча жерде өзгөртүүлөр киргизилди. Келерки аптада сүйлөшүүлөрдүн жыйынтыгын парламентке алып барабыз", — деди өкмөт башчысы.
Учурда коомчулукта Centerra Gold Inc. компаниясындагы Кыргызстандын акциялары Stans Energy ишканасынын доо арызы менен камакта тургандыктан "Кумтөр" боюнча биргелешкен ишкана түзүүгө таасирин тийгизээрин айтышууда. Бул жагдай боюнча Токон Мамытов, андай тоскоолдуктар азырынча жаралбай тургандыгын билдирди.
"Азыр андай тоскоолдук болбойт, сүйлөшүүлөр бүтүп, келишимдерге кол коюлгандан кийин, биргелешкен ишкана түзүү боюнча тиешелүү аракеттерге кандайдыр бир таасирин тийгизиши мүмкүн", — деди Мамытов.
Жогорку Кеңеш өкмөттүн Centerra Gold Inc менен бирдей үлүштөгү биргелешкен "Кумтөр" ишканасын түзүү боюнча токтомдордун аткарылышын 26-февралда канааттандырарлык эмес деп таап, канадалык тарап менен мамлекеттин пайдасын көздөгөн сүйлөшүүлөрдү жүргүзүүгө дагы бир ай убакыт берген.
