БИШКЕК, 18-мар. — Sputnik. Жогорку Кеӊеште курал саткан юридикалык жактардын ишин жөнгө салууну ыраатташтырууга багытталган "Курал жөнүндө" мыйзамга толуктоо киргизүү жөнүндөгү мыйзамдын долбоору каралып, үчүнчү окууда добуш берүүгө жөнөтүлгөнүн парламенттин маалымат кызматы билдирди.
Маалыматтарга ылайык, өлкө аймагында курал саткан 29 дүкөн бар. Анын сегизи Чүй облусунда жана Бишкек шаарында орун алган. Мисалы, борбор калаадагы №64 орто мектептин имаратында курал саткан "Эдельвейс" дүкөнү жайгашкан. Аталган дүкөндүн жабылышын талап кылып, ата-энелер жана мугалимдер нааразычылыгын билдирген. Ички иштер министрлиги ал дүкөндү жабуу аракети көрүлүп жатканын билдирүүдө.
Талкуу жүрүшүндө депутаттар тарабынан курал саткан дүкөндөрдүн турак жайларда жайгашуусуна да тыюу салуу сунушу берилди.
