БИШКЕК, 12-фев — Sputnik. Евразиялык экономикалык биримдикке кошулуу менен аскер продукциясын чыгаруу жогорулайт деп билдирди Sputnik кабарчысы менен болгон маегинде Коргонуу жана коопсуздук боюнча эксперт Токтогул Какчекеев.
Шаршемби күнү, 11-февралда, Кыргызстандын вице-премьер-министри Абдырахман Маматалиев Бишкек шаарында жайгашкан коргонуу өнөр жай ишканаларынын иш-аракеттери менен таанышып чыкты. Ал ЕАЭБга киргенден кийин аскер продукциясына карата суроо-талап өсөт деген үмүт бар деп билдирди.
Биримдикке кошулгандан кийин биздин өлкөдө заказдар пайда болуп, станок паркы жана жабдуулар жаңыланат дейт Какчекеев.
Эксперт совет мезгилинде КРде ракетаны учуруп, алардын учуусун коштоп жүрүү үчүн пайдаланууга боло турган компьютерлер чыгарылчу дейт.
"Биздин заводдордо ири калибрлүү куралдан башка бардык ок атуучу жабдыктардын ок-дарылары чыгарылчу. Алар жакынкы аскер аймагын жана Советтер Союзунун Коргоо министрлигин камсыз кыла турган. Бүгүн мындай багыттагы өндүрүш бизде жок, чыгарылган ок-дарынын калдыктары эле бар. Алар тынчтык мезгили үчүн да, аскер шартындагы мезгил үчүн да зарыл. Аскер мезгилинде ок-дарылар 10 жана 20 эсе көп керектелет. Ал эми тынчтык мезгилинде болсо алар жоокерлерди аскер ишине машыктырууда колдонулат. Ленин атындагы заводдо жылыштар болот деп ойлойм. Бүгүн биз ЕАЭБга кирип жатканыбызга жараша өнөр жай тармагыбыз да өнүгүшү керек. Торпедаларга, суу астындагы курал-жабдыктарга карата суроо-талаптар болот. Бул да өндүрүштүн көтөрүлүшүнө түрткү берет", — деп болжолдойт Какчекеев.
Биримдикке кошулгандан кийин биздин өлкөдө заказдар пайда болуп, станок паркы жана жабдуулар жаңыланат деп кошумчалады ал.
Россия, Белоруссия жана Казакстан 2014-жылдын 29-майында Астана шаарында Евразиялык экономикалык биримдик жөнүндө келишимге кол коюшуп, ал 2015-жылдын 1-январында күчүнө кирген. Экинчи январда ЕАЭБга Армения кошулду, ал эми май айында Кыргызстандын да кошулушу күтүлүүдө.
