БИШКЕК, 10-мар — Sputnik. "Улуттук коопсуздук боюнча мамлекеттик кызматтын Кылмыштуулукка каршы кызматы менин дарегиме койгон айыптоолор негизсиз", — деп билдирди Sputnik кабарчысына Мамлекеттик чек ара кызматынын төрагасынын орун басары Калмурат Байтөлөев.
УКМКнын ККК МЧАКтын төрагасынын орун басарына каршы Кылмыш жаза кодексинин 304- "Кызмат абалынан кыянаттык менен пайдалануу" жана 306- "КРдин кызыкчылыктарына каршы мамлекеттик сатып алууларды жүргүзүүгө келишим түзүү" беренелери боюнча кылмыш ишин козгоду деп билдирет. Ведомствонун пикиринде чиновник тикендүү зымдарды сатып алууда мамлекетке 3,5 миллион сом зыян келтирген.
"Мага каршы козголгон кылмыш иши тууралуу билем. Мен баары туура жасалган деп эсептейм", — деп баса белгиледи Байтолоев.
Ошондой эле Байтөлөев азырынча аталган кылмыш иши боюнча көргөзмө берүүгө тергөөчү чакыра электигин айтты.
УКМКнын билдирүүсүнө ылайык, 2013-жылдын 27-ноябрында МЧАКтын төрагасынын орун басары Б.К. "Мамлекеттик сатып алуулар жөнүндө" мыйзамды бузуп, Мамлекеттик жаза аткаруу кызматына 56 миң 100 метр узундуктагы тикендүү зымды метрин 240 сомдон жалпы баасы 13 миллион 464 миң сомго сатып алганы аныкталган.
"Эталон строй" ЖЧКнын жана "Исраилова" ЖИнин, бааларына ылайык, ошондой эле Соода-өнөр жай палатасынын мониторинги боюнча аталган товардын бир метринин базар баасы келишим түзүлгөн мезгилде 100 сом болгон.
Ошентип, МЧАКтын төрагасынын орун басарынын жана башка кызмат адамдарынын мыйзамсыз аракеттеринин натыйжасында мамлекетке 3 миллион 521 миң 28 сом зыян келтирилген.
Аталган факт боюнча КРдин аскер прокуратурасы кылмыш ишин козгоп, учурда тергөө иштери жүрүп жатат.
