БИШКЕК, 10-мар — Sputnik. Кылмыштуулукка каршы күрөш кызматы оперативдүү-издөө иштеринин жүрүшүндө Мамлекеттик чек ара кызматынын жетекчилиги "Егоза" тикендүү зымдарды сатып алууда кызмат абалын кыянаттык менен пайдаланган факттарды аныктаган деп билдирет шейшембиде Кыргызстандын Улуттук коопсуздук боюнча мамлекеттик кызматынын маалымат кызматынан.
Билдирүүгө ылайык, 2013-жылдын 27-ноябрында МЧАКтын төрагасынын орун басары Б.К. "Мамлекеттик сатып алуулар жөнүндө" мыйзамды бузуп, Мамлекеттик жаза аткаруу кызматына 56 миң 100 метр узундуктагы тикендүү зымды метрин 240 сомдон жалпы баасы 13 миллион 464 миң сомго сатып алганы аныкталган.
"Эталон строй" ЖЧКнын жана "Исраилова" ЖИнин бааларына ылайык, ошондой эле Соода-өнөр жай палатасынын мониторинги боюнча аталган товардын бир метринин базар баасы келишим түзүлгөн мезгилде 100 сом болгон.
Ошентип, МЧАКтын төрагасынын орун басарынын жана башка кызмат адамдарынын мыйзамсыз аракеттеринин натыйжасында мамлекетке 3 миллион 521 миң 28 сом зыян келтирилген.
Аталган факт боюнча КРдин аскер прокуратурасы МЧАКтын төрагасынын орун басарына жана башка кызмат адамдарын каршы Кылмыш жаза кодексинин 304- "Кызмат абалынан кыянаттык менен пайдалануу" жана 306- "КРдин кызыкчылыктарына каршы мамлекеттик сатып алууларды жүргүзүүгө келишим түзүү" беренелери боюнча кылмыш ишин козгоду. Тергөө жүрүп жатат.
