БИШКЕК, 5-фев — Sputnik. Жогорку соттун жарандык иштер боюнча соттук коллегиясы экс-депутат Урмат Аманбаеванын көзөмөл арызын карап, Бишкек шаарынын Биринчи Май райондук сотунун 2015-жылдын 31-январындагы мандаттан ажыратуу боюнча чыгарган чечимин күчүндө калтырды. Бул туурасында Жогорку соттун маалымат кызматы билдирди.
Эскерте кетсек, КРдин Борбордук шайлоо жана референдум өткөрүү комиссиясынын (БШК) 2015-жылдын 14-январындагы токтому менен Аманбаева депутаттык ыйгарым укуктарынан мөөнөтүнөн мурда бошотулган.
Мандатынан ажыратууга макул болбогон Аманбаева Жогорку сотко арыз менен кайрылып, БШКнын токтомун жокко чыгарып берүүсүн өтүнгөн.
Бишкек шаарынын Биринчи Май райондук соту 2015-жылдын 31-январындагы чечими менен БШКнын 2015-жылдын 14-январындагы токтомун жокко чыгаруу чечиминен баш тарткан.
Аманбаева соттун биринчи инстанциясынын чечимине макул эмес болуп, көзөмөл арызы менен Жогорку сотко кайрылган. Анда, Биринчи Май райондук сотунун чечимин жокко чыгарып, жаңы чечим кабыл алуусун жана БШКнын) 2015-жылдын 14-январындагы депутаттык ыйгарым укуктарынан мөөнөтүнөн мурда бошотуу токтомунун 2-жана 3-пункттарын жокко чыгарып берүүсүн суранган.
Башкы прокурор Аида Салянова Жогорку Кеңештин "Республика" фракциясынын депутаты Аманбаевага карата 303-берене "Коррупция" боюнча кылмыш ишин козгогон. Аталган көзөмөлдөөчү орган ал Ош шаарында Кургак учукка каршы күрөшүү борборунда башы эсепчи болуп иштеп турганда, мамлекетке миллион 263 миң 500 сом зыян келтиргендигин кабарлаган.
