БИШКЕК, 4-ноя — Спутник Кыргызстан. Өлкөнүн башкы көзөмөлдөөчү органынын маалыматына ылайык, Урмат Аманбаева Ош облусунун кургак учукка каршы күрөшүү борборун жетектеп турган маалда мыйзамсыз киреше табуу максатында аталган борбордо иштеген кишилерден турган топ түзгөн.
Аманбаеванын мыйзамсыз талаптарын аткаруу максатында облустун кургак учукка каршы күрөшүү борборунун медайымдары борбордун дарыканасынан алынган кымбат дарыларды документтерде талап кылынгандан көп көрсөтүп келген. Көп көрсөтүлгөн дарылар "Б" ЖЧКсынан (уюмдун аты тергөөнүн кызыкчылыгы үчүн маалымдалбайт) алынып келген деп документтерде көрсөтүлгөн. Башкы прокуратуранын басма сөз кызматы билдиргендей, бардык дарылар бюджеттин эсебинен алынган жана ЖЧКнын эсебине которулуп келген. Бул каражатты Аманбаева менен топтун мүчөлөрү бөлүп алып турушкан.
"Кургак учукка каршы күрөшүү борборундагы бул кылмыш 2009-жылдан 2013-жылга чейин жасалып келген. Анын кесепетинен мамлекетке 17 миллион 263 миң 500 сом зыян келген. Башкы прокуратура Аманбаеваны бир нече жолу чакырткан. Бирок депутат айым келген эмес. Учурда Аманбаева "Ош-Кардио" жеке менчик медициналык борборунда дарыланууда. Кылмыш ишин иликтөө Башкы прокуратуранын Тергөө башкармалыгына тапшырылды", — деп айтылат Башкы прокуратуранын билдирүүсүндө.
Урмат Аманбаева Жогорку Кеңештин бешинчи чакырылышына 2010-жылы "Республика" фракциясынан депутат болуп келген. Ал Жогорку Кеңештин коррупцияга каршы күрөшүү комитетинин жетекчисинин орун басары. Өлкөнүн Акыйкатчы институтунун жетекчиси Бактыбек Аманбаевдын эжеси.
