БИШКЕК, 26-янв — Sputnik. Мамлекеттик чек ара кызматынын (МЧК) башчысы Райымберди Дүйшөнбиев "Айкөл" чек ара заставасында болгон окуядан кийин Лейлек райондук чек ара отрядынын жетекчилигин кызматтан алды. Бул тууралуу мекеменин маалымат кызматы билдирди.
Үстүбүздөгү жылдын 16-январында болжол менен саат 22:50дө белгисиз адамдар Лейлек районун чек ара тобунун карамагындагы "Айкөл" чек ара засатавасына куралдуу кол салган. Анын кесепетинен, улук лейтенант Тынчтык Исмаилов каза болуп, эки жоокер жаракат алган. Бул кол салууну чек ара заставасынын аскерлери жасаганын Мамлекеттик чек ара кызматы билдирген эле.
"Жеке курамды көзөмөлдөөнүн төмөндүгү, окуялардын алдын алуу жана ага жол бербөө аракеттеринин жоктугу, жеке тарбия берүүчү иштери болбогондуктан Лейлек чек ара отрядынын жетекчиси жана тарбия иштери боюнча жетекчинин орун басары кызматтан алынды", — деп айтылат маалыматта.
Андан сырткары Мамлекеттик чек ара кызматынын төрагасынын буйругу менен мекеменин Баткен облусу боюнча төрт офицерден турган башкармалыгынын жана МЧКнын башкы аппаратынын төрт кызматкери жаза алды.
