БИШКЕК, 17 янв — Sputnik. "Айкөл" чек ара застава башчысынын орун басарынын абалы оор деп бааланууда деп КРдин Мамлекеттик чек ара кызматынан билдиришти.
2015-жылдын 16-январында болжол менен саат 22:50дө белгисиз адамдар Лейлек районун чек ара тобунун карамагындагы "Айкөл" чек ара засатавасына куралдуу кол салгандыгын МЧКнын маалымат кызматкери Гүлмира Борубаева Sputnikке ырастады.
Куралдуу кол салуунун натыйжасында бир аскер кызматчысы – аталган чек ара заставасынын башчысы Исмаилов курман болуп, эки чек арачы жаракат алды. Лейтенант Осмоновдун абалы оор деп бааланууда, ал эми катардагы жоокер Сагынбай уулу жеңил жаракат алган. Анын абалы канааттандырарлык деп бааланууда. Лейтенант Ош шаарынын бейтапканасына жеткирилди, катардагы жоокер азыр Исфана шаарынын ооруканасында.
Азыркы учурда укук коргоо органдарынын өкүлдөрү менен бирге кылмышкерлерди таап кармоо боюнча атайын операция жүргүзүүдө.
"Чек ара кызматынын Баткен областы боюнча жеке курамы чек араны коргоонун күчөтүлгөн түрүнө өтүштү. Жарадар болгон аскер кызматкерлери Лейлек районунун Исфана шаарындагы бейтапканага жеткирилди", — деп билдирди Борубаева.
Окуя болгон жерде оперативдүү-тергөө тобу иштеп жатат. Чек ара күчтөрү менен башка күчтөрдүн жана каражаттардын өз ара иш-аракеттерин жөндөштүрүү үчүн Исфанага Башкы штабдын жетекчиси КРдин МЧКнын төрагасынын орун басары полковник Искендер Мамбеталиев келди.
