БИШКЕК, 19-янв — Sputnik. "Тумар" бий тобу Түркиянын "Yetenek Sizsiniz" шоусунун жарым финалына өткөнүн Саламаттыкты сактоо министрлигинин маалымат борборунун кеңешчиси Елена Баялинова билдирди.
Ден соолугунан мүмкүнчүлүгү чектелген "Тумар" бий тобунун мүчөлөрү Кара деңиздин жээгиндеги Орду шаарында өткөн сынакка катышкан.
"Ден соолугунан мүмкүнчүлүгү чектелген – Самыйбек кызы Адина, Таалайбек уулу Эрдик, Карабек уулу Талгат жана алардын машыктыруучулары Эрмек Кадыров менен Тимур Сыдыков сынактын калыстарын кайдыгер калтырган жок", — деди ал.
Калыстар бир добуштан кыргызстандык бийчилерди сынактын жарым финалынан көрүүгө ынтызар экенин да билдиришти, дейт ал.
Бийчилер топту дагы кеңейтүүнү пландап жатат, бирок ал үчүн машыгууга ыңгайлуу база жана башка шарттар керек.
