Ош, 10-янв — Sputnik. Ош областында Хизб ут-тахрир экстремисттик уюмдан баш тартып, аны мүчөлүгүнөн чыгып жаткандар бар. Бул туурасында Sputnik маалымат сайтына УКМКнын маалымат кызматынын жетекчиси Рахат Сулайманов билдирди.
УКМКнын маалымат кызматынын жетекчиси Улуттук коопсуздук комитети тарабынан эл арасында радикалдашууну азайтуу боюнча түшүндүрүү иштери жүргүзүлүп жаткандыгын, анын жыйынтыгында экстремисттик партиядан баш тарткан фактылар бар экендигин билдирди.
"Акыркы жыл аралыгында Ош облусу боюнча 15 адам экстремисттик Хизб ут-тахрир уюмунан расмий баш тартып, катарынан чыкты. Алардын ичинен 9у Араван районунун, калганы Ноокат районунун жашоочулары. Булар катардагы эле мүчөлөрү эмес, таасирдүү адамдарынан болгон", — деп билдирди УКМКнын маалымат кызматынын жетекчиси Рахат Сулайманов.
Алардын аталган экстремисттик уюмдан баш тарткандыгын облустук казияттын, райондук акимияттын мүчөлөрү чогулган иш чарада ачык айтылат да, жалпы коомчулукка белгилүү болот.
