БИШКЕК, 21-ноя — Sputnik. Чүй облусунда "Хизб ут-Тахрир" экстремисттик диний кыймылынын аялдар канатынын бир ячейкасынын иши токтотулганын УКМКнын басма сөз кызматы билдирди.
Бул ячейка аталган уюмдун чет өлкөдөгү экстремисттик борборлору менен байланыш түзүп, маалыматтык жактан камсыз кылып келгендиги маалым болду. Андан сырткары Кыргызстандын конституциялык түзүмүн кулатууга чакырган экстремисттик маанайдагы адабияттарды таратууга активдүү катышып келген.
Бишкек шаарынын жана Чүй облусунун бир катар жашоочуларынын жашаган жайларынан экстремисттик маанайдагы 400гө жакын баракчалар, китепчелер жана CD, DVD-дисктер табылган.
Бул фактылар боюнча УКМК тарабынан КРдин Кылмыш-жаза кодексинин 299-беренеси (Улуттук, расалык диний же диндер арасында козутууга багытталган иштерди уюштургандыгы) боюнча кылмыш иши козголду. Бул беренеде алты жылдан сегиз жылга чейин эркинен ажыратуу каралган.
УКМКнын басма сөз кызматы "Хизб ут-Тахрирдин" антиконституциялык ишмердигине багытталган иштерин токтотуу жана аны таап чыгууга багытталган иштердин улана тургандыгын кошумча маалымат кылып билдирди.
