БИШКЕК, 11-дек. — Sputnik. АКШнын мамлекеттик катчысы Майк Помпео Кыргызстандын Бажы кызматынын төрагасынын мурунку орун басары Райым Матраимовдун Магнитский тизмесине киргизилгени боюнча үн катты. Тиешелүү билдирүү анын Twitter баракчасына жарыяланды.
Мамкатчынын айтымында, аталган тизмеге Матраимовдун жубайы Уулкан Тургунова да киргизилген.
"Бүгүн Кыргызстандын экс-чиновниги Райым Матраимов менен жубайынын коррупцияга айыпталып Магнитский тизмесине киргизилгенин билдирем. Биз баарыбыз биргелешип гана коррупцияга каршы туруп, адам укугун бузгандарды жоопкерчиликке тарта алабыз", — деп жазган Помпео.
Today, I am designating former Kyrgyz official Raimbek Matriamov, and his spouse, for corruption in tandem with #GlobalMagnitsky sanctions. We stand #UnitedAgainstCorruption and promote accountability to deter human rights abuses globally.
— Secretary Pompeo (@SecPompeo) December 10, 2020
Райым Матраимов АКШнын Финансы министрлигинин санкциялык тизмесине 9-декабрь күнү киргизилген. Эмбарго коррупция жана адам укугунун бузулушу боюнча күнөөлөнгөн тараптарга каршы багытталган Магнитскийдин глобалдуу мыйзамынын негизинде жарыяланды.
