БИШКЕК, 20-мар. — Sputnik. Коронавирус учурунда дем алуу органдары гана эмес, тамак-аш сиңирүү системасы дагы жабыркайт. Мындай бүтүмгө COVID-19га чалдыккан бейтаптардын маалыматын анализдеген америкалык окумуштуулар келгенин "Известия" басылмасы жазды.
Адистер алгач илдеттин очогу болгон Кытайдын Ухань шаарында жайгашкан үч ооруканадагы 204 бейтаптын ден соолугуна байкоо салышкан. Алардын жарымы табити жоголуп, ичи өтүп жатканын айтышкан. Кээде жүрөгү айланып, кускусу келип, ичи ооруп жатканына даттанышкан.
Натыйжада окумуштуулар кадимки суук тийүүнүн белгилери барлар биринчи толкунга, ал эми тамак-аш сиңирүү системасындагы симптомдор экинчи толкунга кирет деген жыйынтыкка келишкен.
Ошондой эле америкалык изилдөөчүлөр ичеги-карынында өнөкөт оорулары бар адамдардын вирусту жеңиши кыйын экендигин белгилешкен.
