БИШКЕК, 2-окт. — Sputnik. "Ислам мамлекети " террордук тобу Лас-Вегастагы атышуунун жоопкерчилигин өз мойнуна алганын жар салды. Бул туурасында РИА Новости Рейтер агенттигине шилтеме кылып кабарлады.
Террордук уюм кырсыкты ишке ашыргандар "мындан бир нече ай мурда ислам динин кабыл алышканын" айтышкан.
Атышуу жекшемби күнү музыкалык фестиваль болуп жаткан учурда Mandalay Bay деп аталган отель-казино менен аэропорттун ортосунда болгон. Маалыматтарга караганда, 59 киши каза таап, 400дөн ашуун адам жаракат алган. Ал эми кылмышкер аны полиция кармоо үчүн курчоого алганда өзүн-өзү өлтүргөн.
Ок чыгарган киши 64 жаштагы жергиликтүү Стивен Пэддок аттуу адам экендиги маалым болду. Ал Mandalay Bay мейманкана комплексинин 32-кабатынан фестивалдын катышуучуларын карай ок жаадырган. Буга чейин Пэддок мыйзам бузуп, Невад полициясынын көзүнө чалдыккан эмес.
Ал 28-сентябрда жашаган меймаканадагы номерден кеминде 10 чакты курал табышкан.
Бул трагедия АКШдагы кандуу окуялардын бири болуп калды.
