Чай ичишип жүрчү элек го! Сапар Исаковдун апасы президентке кайрылган видео

Сот отурумунан кийин Сапар Исаковдун апасы Нургүл Өмүрбаева ЖМК аркылуу өлкө башчысы Сооронбай Жээнбековго кайрылды.

Өмүрбаева ак ийилип бирок сынбай турганын айтып, Исаков ушул учурга чейин ак иштеп келгенин белгиледи.

"Кудай деле көрүп турат. Бир жерден бир нерсени жеп алайын деген ою болгон эмес. Чындык кайда? Калыстык кайда? деген суроо бергим келет. Ушул убакка чейин өлкөнү талап тоногондор кутулуп кетип жатпайбы, алар эмне менен кутулуп жатат? Акча менен кутулуп жатат. Ооруканага да жатып алып, кээси качып кетип жатат. Менин балам качкан жок. Эмнеге качат? Эл алдында, журт алдында жүзү жарык болсо эмнеге качат?" — деп суроо салды ал.

Исаковдун апасы анын бир гана айыбы эл үчүн иштеп бергени экенин билдирди.

"Бир гана айыбы, эл үчүн иштеп, кызмат кылам дептир. Элдин багын ачам деп жүргөн саясатчы, инсан. Иш дегенде ичип аткан ашын жерге коюп чуркайт. Жумуштан түн жарымда келип дагы ойлонот, иштейт. Уктаса 2-3 саат эле уктайт. Кайра таң атпай туруп кетет. Үй-бүлөсүнө да жакшы көңүл бөлө алган жок. Кичинекей кыздары куса болуп жатат. Үй-бүлөсүн ойлош керек, жардам бере турган эч ким жок. Эгерде коррупционер болсо акча менен эле чыгырап албайт белек", — деди ал.

Өмүрбаева ошондой эле президент Сооронбай Жээнбековго кайрылып, ишти туура жагынан чечип берүүгө жардам сурады.

"Сооронбай Жээнбековго кайрылгым келет. Ушул ишти көзөмөлгө алып, акыйкаттык менен чечип берүүңүздү суранам. Бир кезде сыйлашып чай ичишип жүргөн адамдардан элек го. Кандай болуп калды мен түшүнбөй калдым. Сөз жетпейт", — деди Өмүрбаева.

Белгилей кетсек, Сапар Исаков 2013-жылы президенттин аппарат жетекчисинин орун басары рангындагы тышкы саясат бөлүмүнүн жетекчиси кызматында турган кезде "Бишкек ЖЭБин модернизациялоо" долбоорун ишке ашырууда өзүнүн саясий абалынан пайдаланган деп айыпталууда. Ал адамдардын бир тобу менен алдын ала белгиленген иш аракеттер аркылуу подрядчыны тандоо сынагында чет элдик компаниянын кызыкчылыктарын колдогон. Натыйжада мамлекеттик жана коомдук кызыкчылыктарга ири көлөмдөгү чыгым келтирилгенин УКМК билдирүүдө.