БИШКЕК, 4-май — Sputnik. Футбол боюнча Кыргызстандын курама командасы апрелдеги FIFA рейтингинде мурдагы 128-ордун сактап калды. Бул тууралуу FIFA уюмунун расмий сайтына жарыяланды.
Кыргызстандын курама командасы апрель айында бир да жолу беттеш өткөргөн эмес.
Азия кубогунун тандоо оюндарында Кыргызстандын жакынкы атаандашы болгон Индиянын курамасы (100-орун) жаңы рейтинг боюнча өзүнүн көрсөткүчүн бир тепкичке жакшырткан.
КРдин тайпадагы атаандаштары Мьянма 166-орунда болсо, Макао 184-орунга чыккан.
Ал эми коңшу мамлекеттер Өзбекстан 60-орун, Кытай 81-орун, Казакстан 104-орун жана Тажикстан 138-орунду камсыздашкан.
Рейтингдин көч башында Бразилия, Аргентина жана Германия турат.
Айдын мыкты курама командасы деп Мадагаскар табылган. Ал өзүнүн көрсөткүчүн тогуз тепкичке жакшыртып, 111-орунга чыккан. Ал эми эң начар команда деп Малави табылды.
Рейтинг эми 1-июнда жаңыланат.
