БИШКЕК, 2-июн. — Sputnik. Белгилүү ырчы, аткаруучу Малик Аликеев менен маданият министри Азамат Жаманкулов видео аркылуу байланышып, ден соолугунан кабар алды. Бул тууралуу аталган ведомствонун маалымат кызматынан кабарлашты.
Ал ырчынын саламаттыгы, жакынкы аралыкта өтө турган операциясы жана чыгармачылыгы тууралуу сүйлөшкөн.
"Сүйлөшүп жатканда министр Маданият министрлиги ырчынын өзгөчө талантын эске алуу менен мамлекеттик сыйлыкка көрсөтө тургандыгын айтты", — деп жазылган маалыматта.
Аликеев Таласта болгондугуна байланыштуу, кабар алуу WhatsApp аркылуу жүргүзүлүп, ага министрдин орун басары Кайрат Иманалиев да катышкан.
Эске салсак, ооруп жаткан Малик Аликеев менен Sputnik Кыргызстан агенттиги байланышып, ден соолугун, абалын билген.
Ырчы бул күндөрү ооруп, баса албай төшөктө жаткандыгын айтып берген.
"Азыр ооруп, баса албай төшөктө жатам. Мындан төрт жыл мурда бутума операция жасаткам. Андан кийин атайын жабдуу (ходунок — ред.) менен басып жүрүп жакшы болуп кеткем. Бир жолу кышында тепкичтен жыгылып кетип, операция болгон жерге доо кетип калыптыр. Ошондон кийин баса албай калдым. Эми, буюрса, жакында кайра операция жасатам. Негизи ушул жылдын март айында жасалмак, бирок кальцийим нормадан аз болуп, улам жылып калууда", — деген Аликеев.
Малик Аликеевге операцияны белгилүү хирург-ортопед Сабырбек Жумабеков жасай турганы айтылууда. Дарыгердин айтымында, ал буга чейин да Аликеевге кашка жилик менен жамбаштын ашташкан жерине (эки жагына тең) операция жасап берген экен.
