ЖАМК абактарда коронавирус пайда болду деген маалыматты төгүндөдү

БИШКЕК, 16-май — Sputnik. Жазаларды аткаруу мамлекеттик кызматы (ЖАМК) интернеттеги №1 тергөө абагынын жана Молдовановка айылындагы №27 түзөтүү колониясынын кызматкерлеринен коронавирус аныкталды деген маалыматты четке какты.

Ведомстводон билдиришкендей, буга чейин №1 тергөө абагынын, Бишкек №47, Степное №2, Ново-Покровка айылындагы №3, Молдовановка айылындагы №27 колонияларындагы кызматкерлер жана госпиталда иштеген 18 медик тест тапшырды. Баарыныкы таза чыкты.

Маалыматка караганда, эгер кимдир бирөөдө вирустун белгиси билинсе, дароо ЖАМК бейтапканасына жөнөтүлөт. Андан обочолонууга же үй карантинине чыгарылат.

"Учурда кызматкерлер жана жаза өтөп жаткандар арасында коронавирус жуктургандар жок. Күн сайын ар бир кишинин дене табы текшерилип турат. Ошондой эле дезинфекциялык иштер уланууда. Буга чейинки интернетте тараган маалымат чындыкка туура келбейт", — деп айтылат билдирүүдө.

Буга чейин №1 тергөө абагынын бир кызматкеринен коронавирус аныкталган. ЖАМКтан билдиришкендей, ал адам канцелярия бөлүмүндө иштегендиктен, изолятордун аймагына жана соттолуучуларга жологон эмес.

Коронавирустун кесепети

Кыргызстанда коронавируска кабылгандардын саны 1117ге жетип, анын ичинен 783ү айыгып чыкты. Тилекке каршы, 14 бейтап каза болуп калды.

11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагына карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.

Sputnik Кыргызстан өлкөдөгү кырдаал боюнча бүгүн да окурмандарга текст, сүрөт жана видео түрүндө маалымат берүүсүн улантууда.

Кабарларды ыкчам, ыңгайлуу шартта окуу үчүн Telegram-каналыбызга баш багыңыз.