БИШКЕК, 17-апр. — Sputnik. Чүй облусундагы №17 үйбүлөлүк дарыгерлер борборунда иштеген төрт медицина кызматкеринен коронавирус аныкталып, бейтапкана жабылды. Бул тууралуу Саламаттык сактоо министрлигинин маалымат кызматы кабарлады.
Билдирмеге ылайык, аталган Үйбүлөлүк дарыгерлер борбору Бишкектин четиндеги Чоң-Арык айылында жайгашкан.
"Коронавирус жуктуруп алган медицина кызматкерлеринин төртөө тең дарыгер. Алар вирусту кантип жуктуруп алганын атайын комиссия иликтейт. Буга байланыштуу бейтапкана дезинфекциялоого убактылуу жабылды", — деди министрликтин маалымат кызматы.
Министрлик дезинфекциялоо иштери аяктаганга чейин №17 бейтапканасында каттоодо тургандар Ленин районундагы үй-бүлөлүк дарыгерлер борборуна кайрыла алышарын кошумчалады.
Коронавирустун кесепети
Кыргызстандын төрт шаары жана төрт районуна 30-апрелге чейин өзгөчө абал режими киргизилген. Бул аймактарда кечки саат 9.00дөн эртең мененки 6.00гө чейин коменданттык саат иштейт.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
