БИШКЕК, 29-мар. — Sputnik. Москванын Шереметьево аэропортунда калган кыргызстандыктар чартердик рейс менен Бишкекке алып келинди. Бул туурасында Кыргызстандын Россиядагы элчилигинин маалымат кызматы билдирди.
Мекендештердин ыраазычылык билдирип жаткан видеосу соцтармакка дагы тарады.
Белгилей кетсек, кыргызстандыктар 24-марттан бери мекенине келе албай жаткан. Алар буга чейин билет сатып алган каттамдардын баары токтотулгандыктан Шереметьево аэропортунда кармалып турушкан. Алардын арасында транзиттик аймакта калып калгандары дагы бар эле.
“Бүгүн эртең менен саат 7.40та “Аэрофлот” авиакомпаниясынын учагы Кыргызстандын 398 жаранын Бишкекке алып кеткен. Алардын арасында буга чейин аэропортто калган 62, транзиттик аймакта турган 44 мекендешибиз дагы бар. Дагы 40ка чукул жаран учакка батпай калды. Аларды Москвадагы коомдук уюмдар жатаканага жайгаштырып, тамак-аш менен камсыздап турмай болушту. Дагы бир каттам уюштуруу маселеси каралса, алар дагы кетишет”, — дешти элчиликтен.
Элчилик Новосибирск шаарындагы аба майданда кармалып турган кыргызстандыктарды алып келүү боюнча дагы сүйлөшүүлөр жүрүп жатканын белгиледи.
Эске салсак, дүйнө боюнча коронавирус тарап жаткандыгына байланыштуу "Манас" аба майданы бир катар авиакомпаниялардын рейстерин убактылуу токтоткон. Жумасына бир жолу учуп туруу чечими кабыл алынган, бирок кийин ал дагы токтоп калган.
Ал эми Россия 27-марттан тарта эл аралык каттамдарга чектөө киргизген.
