БИШКЕК, 26-мар. — Sputnik. Москва шаарындагы кыргыз диаспораларынын өкүлдөрү аба каттамдары токтоп калып, аэропортто калган кыргызстандыктардын абалын билди. Бул тууралуу Кыргызстандын Россиядагы элчилигинен кабарлашты.
Эске салсак, Россия 27-марттан тарта бардык авиакаттамдарын токтотууну пландап жатат. Буга чейин 24-март күнү Москва шаарынын Шереметьево аэропортунан 239 кыргызстандык мекенине учуп кете албай калганы боюнча Кыргызстандын Россиядагы элчилиги кабарлаган. Алар мурда билет сатып алган каттамдардын баары токтотулгандыктан, Шереметьево аэропортуна учуп кетүүнү көздөп келген. Бирок Бишкек жана Ош шаарына каттамдар жылдырылган үчүн уча албай калышкан.
"Аэропортто калган кыргыз жарандарынан Москва шаарындагы кыргыз диаспораларынын өкүлдөрү кабар алды. 25-март күнү Шереметьево аэропортунда 78 кыргыз жараны бар экени маалым болгон. Мындан сырткары, Нью-Йорк, Минск, Мальдив, Лондон, Орегондон учуп келген 14 транзиттик жаран аныкталган. Диаспора өкүлдөрү аларга Кыргызстанда коронавирустан улам өзгөчө абал жарыялангандыгын түшүндүрүп, аба каттамдары убактылуу токтотулгандыктан, аэропортто калбай эле коюуну айтышкан. Түшүндүрүү иштеринен кийин көпчүлүк Москвада убактылуу жашап турмай болушкан. Азыркы тапта Домодедово жана Шереметьево аэропортторунда чогулуп турган кыргыз жарандары жок", — деп айтылат маалыматта.
Аэропорттун транзиттик аймагындагы жарандар менен да сүйлөшүү жүрүп, аларга тамак-аш уюштурулгандыгы айтылды. Аба каттамын күткөн жарандардын арасында буту ооруган бир адам бар экени аныкталып, элчилик аны Москвадан дарылатуу маселесин кароодо.
Россиядагы Кыргызстандын элчилиги күнү-түнү иштеп жатканын, штаб мүчөлөрү аэропорттордо нөөмөткө туруп жатканын эскертти.
Эгер кандайдыр бир суроолор жаралып калса, +7 499 238 50 69, +7 499 237 33 04, +7 925 103 29 11 (вотсап) телефондору аркылуу байланышуу болору айтылды.
