11:17 15 Теке 2020
Түз эфир
  • USD77.5098
  • EUR87.9814
  • RUB1.0897
Коом
Кыскача шилтеме алуу
Психолог менен баарлашуу (113)
16855 0 0

Sputnik Кыргызстан купуялуулук шарты менен окурмандардын жеке турмушуна байланышкан көйгөйлөрдү жарыялап келет.

"Психолог менен баарлашуу" рубрикасынын бул жолку чыгарылышында эки күйөөдөн чыгып, эки кызы менен төркүнүндө жашап жаткан келиндин каты жарыяланды.

Саламатсыздарбы? Жашым 28де. Окууну бүткөндөн кийин биринчи жолдошум ала качып кетти. Бирок никебиз көпкө созулган жок, үч жылдан соң ажырашып кеттик. Бир кыздуу болгонбуз, ажырашкан кезде ага болгону 40 эле күн толгон. Көп нерсеге кайненем күнөөлүү болуп калды...

Күйөөм менен ажырашып, кызым менен төркүнгө бардым. Эптеп аны үч жашка чыгардым да Россияда иштеген агамдын жанына кеттим. Кызым болсо ата-энемде калды. Россияда ар кандай жумуштарда иштеп жүрүп, бир күнү бир бала менен таанышып калдык. Карасам өзүнө тың адам экен. Кыз-жигит болуп сүйлөшүп баштагандан кийин беш күн өтпөй эле колумду сурады. Албетте, дароо макул болгон жокмун. Күйөөгө тийип чыкканымды, кызым бар экенин айтсам болбой "кызыңа ата болуп берейин" деп туруп алды. Ал бала байкемди таанычу. Ага да баарын айтып коюптур. Агам "жакшы бала" деп көндүрдү. Ошентип акыры макул болдум. Москвада нике окутуп, чогуу жашай баштадык. Ата-энеси тууралуу сурасам "атам жок, бир иним, эки карындашым бар, алар өздөрү менен өздөрү" деп койгон.

"Жок дегенде апаң туугандарыма барып алдыман өтүп койсун" десем, ар кайсы шылтоону айтып болгон жок. Бир жылдай жакшы жашадык. Андан кийин эки жакка жумуштары менен көп чыгып эле үйгө токтобос болду. Боюмда бар болчу, ага карабай бир ай үйдө болсо, 15 күн жумуштары менен командировкага кетет. Кара жанын эле ойлойт. Мен болсо кош бойлуумун, иштеп батирге акы төлөйм. Айтор, төрөгүчө араң чыдадым да акыры "Кыргызстанга кетели" дедим. Төрөп, баланын кыркы чыккандан кийин билет алып мени Кыргызстанга жөнөттү. Өзү "эки жумада артыңан барып калам" деген, ошол бойдон жети айдан бери жок. Ата-энемдин эл караган бетин жер караттым. Кошуна, туугандардан уялганымды айтпаңыздар. Апам "кайдагы аферист, алдамчыга тийип алгансың" деп жинденет. Кызым ооруп ооруканага жатып чыктык, анда да кабар алган жок. "Апаң небересин көрүп кетпейби" десем, энеси "үйлөнгөндө мага айтпай, өзүң билип үйлөнүп алгансың" деп таарынып жатыптыр. Эки эрге тийип багым ачылбас болду. Эл-журттан уялганымдан кээде өз өмүрүмө кол салгым келет. Бирок кыздарымды кыя албай кетем. Кыздарымдын бири алтыда, бири сегиз айлык. Аталары жок өсүп жатканы өкүндүрөт.

Азыр эмне кылышты билбей, дендароо эле болуп жүрөм. Кеңеш бериңиздерчи...

Муратбек Султанбеков, психолог:

Кат жазган келиндин жашоо-турмушу азыр оор экен. Сезимдерине таянып, ишенчээктигинен ар кайсы адам менен сүйлөшүп, аларга турмушка чыгып алган. Үй-бүлөдөгү тарбия дагы мындай кырдаалдын себеби болушу ыктымал. Анткени кыз баланын мүнөзүнүн калыптанышына, өсүшүнө ата-эненин тарбиясы таасир этет. Бирок азыр келиндин кандайча бул кырдаалга туш келип калганын анализдебей, мындан ары эмне кылышы керектигине жардам беришибиз керек. Турмуштан адашты, өтөрү өттү. Бирок өкүнүп, артка кылчайып ал жашоону эстөөнүн кажети жок. Андан пайда да чыкпайт. Өткөнгө өкүнүп кейий берсе, стресс болуп бул абалы депрессияга алып келиши ыктымал.

Кат жазган келинге айтарым, эки жолу турмушум бузулду деп өзүңүздү күнөөлөбөй, эч кимден уялбай башты көтөрүп жашаңыз. Өзүңүздү ичиңизден жебеңиз. Мунун баарына жалгыз сиз күнөөлүү эмес экениңизди эстен чыгарбаңыз. Ата-энеңиз кашыңызда, ден соолугу чың эки кызыңыз бар экен. Мындан ары балдарды ойлоп, алар чоңойгуча иштеп, буттан турууга аракет кылышыңыз керек. Эки күйөөдөн тең жардам күтпөңүз. "Кайра келеби, кайра кайтарып алам" деген үмүттү токтотуш керек. Убакыт деген учкан куш, ал эми үмүт өлбөйт. Аларды күтүп, үмүт кылып жүрө берсеңер убакытты өлтүрүп аласыңар. Андан көрө ата-энеңиз менен урушуп-талашпай, алар менен жакшы мамиле түзүп, күнөө кетирсеңиз кечирим сурап, аларга таянып жашаңыз. Анткени ата-эне гана баарына чыдайт. Алар кыйын кырдаалда да таштап кетпейт. Туугандар менен да байланышты үзбөңүз. Жамандап, ушак айтса да, бирде болбосо бирде колдоо көрсөтөт. "Өзүм менен өзүм болуп, турмушумду өзүм эле оңдоп кетем" деген эгоисттик ойлордон алыс болуңуз.

"Жанымды кыям, эмне кылышым керек" деген ойлор таптакыр болбош керек. Экинчи күйөөсү жоопкерчилиги, көңүлү жок экени айдан ачык көрүнүп турат. Ошондуктан белиңизди бекем бууп, күчтүү болуңуз. Жалгыз эмес экенсиз. Колуңуздан келсе кыздарга алимент жаздырып алыңыз. Ошондой эле мүмкүнчүлүк болсо, психологго да кайрылып абалыңызды жөндөп алсаңыз деле ашыкча болбойт.

Тема:
Психолог менен баарлашуу (113)

Тема боюнча

Күйөөм сыртка чыкса эле баягысы менен жүргөндөй туюлат... Аялдын каты
Күйөөм оорудум деп анткорлонуп жүрүптүр. Алданган келиндин каты
Жаш жигит колумду сурап жатат... Жалгыз бой аялдын каты
Белгилер:
психолог, кат, келин, турмуш, үй-бүлө

ЭҢ МААНИЛҮҮ