Жекшемби күнү Жогорку Кеңештин депутаты Тазабек Икрамов Sputnik Кыргызстан агенттигинин журналисти менен телефондо сүйлөшүп жатып аны "келесоо" деп кемсинткен.
Кабарчы 20-сентябрда болгон окуяга байланыштуу депутат айдоочусуна чара көрөбү же жокпу деген суроого жооп алуу үчүн телефон чалган болчу.
Sputnik Кыргызстан агенттиги кабарчыны "келесоо" деп атаган депутат буга чейин эмнеси менен элге таанылып, дагы кайсы жерде "балп" эткенин эске салууну эп көрдү.
Депутатты тааныткан KG номер
Тазабек Икрамов Жогорку Кеңештин жыйынында депутаттар эл менен жолугушуу үчүн аймактарга барганда аларга ким келгенин билбей жатканын жана эл өкүлдөрү жолдо баратканда эч ким тоскоолдук кылбашы керектигин айткан.
"Биз аймакка чыкканда эл депутаттын келгенин билип, көбүрөөк чогулушу үчүн жана жолдо бара жатканда депутатка тоскоолдуктар болбошу үчүн мурдагы КG номерлерди кайтаруу керек болуп жатат. Мейли кызматтык унааны кайтарбай эле коелу. Бирок КG номерлер керек", — деп маселе көтөргөн.
Муну уккан коомчулук "депутат КG номери менен эмес, иши менен таанылсын" деп катуу сынга алган.
Жолдон чайпалып өткөн жөө адамдар
Парламенте мас абалда жол кырсыгына себепкер болгон айдоочуну өмүр бою унаа айдоо укугунан ажыратуу боюнча мыйзам долбоору каралып жатканда Тазабек Икрамов жөө адамдарды сындаган.
"Кайгуул милиция (МАИ) кызматкерлеринде видео байкоо сөзсүз болушу керек. Туура эмес кармаган кызматкерлер жазаланышы зарыл. Жол чырак күйсө эле адамдар да өтүп жатат. Буларга өзүнчө жол ачышыбыз керек да. Оң жакка бурула турган белги күйгөндө адамдар да кошо басып, тыгын пайда болууда. Азыркы жөө жүргөн жарандарыбыз дагы чайпалып, телефон менен сүйлөшүп бир канча убакытты алууда", — деп айткан.
Кийин социалдык тармактардын колдонуучулары эл өкүлүнүн "чайпалып" деген сөзүн азил-тамашага салып, бир далай постторду жазышкан
Көлөмү чөнтөк блокнотундай объектиге ээлик кылат
Икрамов 2015-жылдагы декларациясына аянты 1784 чарчы метрлик үйгө ээлик кыларын көрсөткөн. Мындан сырткары, чарбалык курулушу бар экенин да белгилеген. Кызыгы анын аянты болгону 0,20 чарчы метр экени айтылат. Эсептей келгенде анын көлөмү чөнтөк блокнотунун көлөмү менен барабар.
Мегатонн же мегаватт?
Депутат Жогорку Кеңештин трибунасында айтчу сөзүн таппай туталанып калганы да элдин эсинде калды.
Икрамов катардагы жыйындардын биринде шаардыктарга электр энергиясынын тарифин кымбаттатуу боюнча сүйлөп жатып ыңгайсыз абалга кептелген.
Ал видеосу социалдык тармактарга тарап кетип Икрамов интернет колдонуучуларынын күлкүсүнө калган.
Кесиптеши менен "кагышканда"
Мектеп көйгөйлөрү боюнча болгон талкуу Икрамовдун кесиптеши менен кер-мур айтышуусу менен коштолгон. Социалдык маселелер, билим берүү, илим, маданият жана саламаттык сактоо боюнча комитетинин жыйынында ал Евгения Строкова менен баланы мектепке кабыл алуу көйгөйүн талкуулап жатканда айтыша кеткен.
Алардын кер-мур айтышуусу экөөнүн бири залды таштап чыгып кетүүсү менен аяктаган.
