Алайдын Сары-Таш жайлоосундагы жайыт Өзбекстанга пайдаланууга берилиши мүмкүн

Жазылуу
Союз мезгилинде аталган аймактагы жайытты келишимдин негизинде Өзбекстан тарап пайдаланып келген

ФЕРГАНА, 29-мар. — Sputnik. Ош облусундагы Алай районунун Сары-Таш жайлоосундагы жайытты келишимдин негизинде Өзбекстанга пайдаланууга берүү маселеси каралып жатат. Мындай пикирин өкмөттүн Оштогу өкүлү Таалай Сарыбашов эки мамлекеттин өкмөттөрүнүн жолугушуусунда журналисттерге билдирди.

Анын айтымында, аталган аймакты СССР маалында Өзбекстан келишимдин негизинде жайыт катары пайдаланып келген.

"Сары-Таш жайлоосундагы жайыт учурда жергиликтүүлөр тарабынан пайдаланылбай турат. Союз мезгилинде кошуна өлкө менен жайыттарды пайдалануу боюнча келишимдер түзүлүп келген. Бүгүнкү жолугушууда бул маселени карап чыктык. Эгерде бул демилге ишке ашса, анда Алай районунун экономикасынын көтөрүлүшүнө да чоң салым болот", — деди Сарыбашов.

Мындан сырткары, Өзбекстанга Алайдын картошкасын, Ноокаттын алмасын Кара-Кулжанын балын экспорттоо боюнча сүйлөшүүлөр жүрүп жатат.

Визит премьер-министра Сапара Исакова в Узбекистан - Sputnik Кыргызстан
Өзбекстан өкмөт башчы Сапар Исаковду өзгөчө салтанат менен тосуп алды. Сүрөт
"Аталган продукцияларды буга чейин да экспорттоп келгенбиз. Эми алардын көлөмүн көбөйтүү жагы каралууда. Өзбекстан тарап Кыргызстандагы мал этине кызыгып жатышат. Анткени бизде өндүрүлгөн эттер экологиялык жактан таза. Айыл чарба продукциясынан сырткары, курулуш материалдарын да экспорттоо маселелери каралды. Мисалы, Өзгөндө сары таш өндүрүлөт", — деди Сарыбашов.

Ал ошондой эле Ош облусунун Өзбекстандын Анжиан облусу менен чектешкен аймагы 241 чакырымды түзөөрүн кошумчалады. Анын 37 чакырым аралыгы тактала элек жана учурда атайын комиссия бул аралыкты тактоо боюнча иштеп жатат.

Жаңылыктар түрмөгү
0