БИШКЕК, 22-дек. — Sputnik. Бишкектен алыс эмес жердеги Беш-Күңгөй айылында Volkswagen Passat үлгүсүндөгү унаа аңга кулап бир нече адам жабыркаган.
Социалдык тармакка чыккан видеодон топтошкон кишилер жабыркаган адамдарды унаадан чыгарып жатышканын көрүүгө болот. Айрым жабырлануучулар эсин жоготуп койсо, дагы бирөөлөрү оорудан онтоп жатканы жаңырат.
Тез жардам кызматынын реанимация бөлүмүнүн башчысы Егор Борисов кырсыктаган адамдарга жардам көрсөтүүдө эмнелерди кылбаш керектигин айтып берди.
"Жол кырсыгынан жарандар ар кандай жаракаттарды алышат. Дарыгерлер келгиче көрсөтүлгөн туура эмес жардам жабырлануучулардын абалын ого бетер оорлотуп жибериши мүмкүн. Айрыкча башынан жаракат алгандарды абайлаш керек. Унаанын ичинен бейтапты ары-бери жулкуп чыгарганда анын омурткалары жабыркап майып болуп калышы мүмкүн", — деди Борисов.
Анын айтымында, жол кырсыктын күбөлөрү жабыркаган адамдын денесин кыймылдатпаганга бардык күч аракетин жумшашы керек. Эгер унаадан өрт чыккан болсо андагы адамды кылдаттык менен алып чыгуу зарыл. Айрыкча адамдын башы денесине жараша турган абалын өзгөртпөшү керек.
