БИШКЕК, 23-ноя. — Sputnik. Башкы прокуратура 4-ноябрда президенттикке талапкерлигин койгон Өмүрбек Бабановго карата кылмыш ишин козгоду.
Көзөмөл органынын берген маалыматына караганда, Бабанов президенттик кызматка талапкер катары шайлоо алдындагы үгүт иштеринин жүрүшүндө Ош шаарынын Амир Темир (Он-Адыр) кичи районунун жашоочулары, негизинен өзбек тектүүлөр менен жолугушкан.
Экс-талапкер тургундардын добушун алуу максатында өзбектердин укугу тебеленип жатканын, мамлекеттик органдар тараптан басымга кабылганын, улуттук теңсиздик бар экенин айтып, буга каршы жигердүү күрөшүүгө чакырганын Комплекстүү филологиялык-саясий экспертиза аныктаганы жарыяланган.
Акыркы маалыматтар боюнча Өмүрбек Бабанов Россияда жүрөт. Кийинчерээк ал "Республика — Ата-Журт" фракциясынын лидерлигинен кеткени жарыяланган.
Белгилей кетсек, Бабанов буга чейин вице-премьер жана өкмөт башчы болуп иштеген.
Sputnik Кыргызстан агенттиги Кыргызстанга кайтып келсе түрмө же жок дегенде укук коргоо органдарынын сурагы күтүп турган саясатчылардын тобун тизмектеди.
Аскар Акаев
Кыргызстандын туңгуч президенти 2005-жылы болгон "Жоогазын" революциясынан кийин Москвада жашап келет. 2014-жылы бир тууган агасы Болот Акаев көз жумганда коомчулук арасында "Аскар Акаев бир тууганына топурак салуу үчүн келет болду бекен" деген кептер жүрө баштаган. Ошол убактагы башкы прокурор Аида Салянова Акаев мекенине кайтса суракка алынарын билдирген. Буга президенттин айланасындагы адамдарга жана туугандарына козголгон кылмыш иши дагы деле жабыла электиги себеп экени айтылган. Аскар Акаев 2006-жылы Асанкул аттуу агасынан дагы ажыраган. Бирок топурак салуу үчүн келген эмес.
Айдар Акаев
Аскар Акаев президент болуп турган учурда анын улуу баласы Айдар Акаев депутат болуп шайланып, кийин Каржы министрлигинде иштеген. Ал "Кумтөр" боюнча келишим түзүүдө коррупцияга жол берген деп айыпталып, издөөгө алынган.
Николай Танаев
Акаевдин учурундагы акыркы өкмөт башчы Николай Танаев дагы "Кумтөр" келишими боюнча коррупцияга айыпталып, ага эки ирет издөө жарыяланган.
Курманбек Бакиев
2005-2010-жылдар аралыгында Кыргызстандын президенти болгон Курманбек Бакиев 2010-жылдын 7-апрель окуяларынын башкы "каарманына" айланган. Жогорку сот экс-президентти сыртынан өмүр бою эркинен ажыратып, бирок анын жаш курагына байланыштуу 30 жылга кесүү чечимин чыгарган.
Курманбек Бакиев 2010-жылдан бери Белоруссияда жашап келет. Бул өлкө аны Кыргызстанга экстрадициялоодон баш тарткан.
Максим Бакиев
Курманбек Бакиевдин уулу жана бейрасмий түрдө атасынын мураскери аталып келген Максим Бакиев сыртынан өмүр бою эркинен ажыратылган. Ал кылмыштуу кирешелерди мыйзамдаштыруу, опузалоо жана каражатты сыртка чыгарып кетүүгө айыпталып, күнөөсү далилденген. Учурда ал Лондондо жашайт.
Жаныш менен Марат Бакиевдер
Бакиевдердин тизмеси ушуну менен эле токтоп калбайт. 7-апрель окуялары боюнча Мамлекеттик күзөт кызматынын жетекчиси, Курманбек Бакиевдин бир тууганы Жаныш Бакиев сыртынан өмүр бою эркинен ажыратылган. Курманбек Бакиевдин уулу жана УКМКнын жетекчисинин мурдагы орун басары Марат Бакиев дагы сыртынан 27 жылга кесилген. Болжол боюнча учурда экөө тең Белоруссияда жашап келет.
Данияр Үсөнов
Бакиевдин учурунда Данияр Үсөнов вице-премьер, мэр жана президенттин администрация башчысы болуп эмгектенген. Бакиевдин учурундагы акыркы премьер-министр болгон. 7-апрель окуялары боюнча сыртынан соттолгон. Учурда чет өлкөдө.
