Жакшы тилек менен ажылык сапарга аттанып жаткандар ыйык Мекке жана Медина шаарларына барганда эмнелерди кылганга болбой турганын алдын ала билип алгандары оң. Буга байланыштуу Sputnik Кыргызстан агенттиги Кыргызстан мусулмандар дин башкармалыгынын фатва бөлүмүнүн адиси Бактияр Токтогазы уулунун жардамы менен зыяратчыларга тыюу салынган нерселерди санап чыкты.
Аңчылыкка тыюу салынат. Зыярат кылганы барган адамдарга жан-жаныбарларды өлтүрүүгө, аңчылык кылууга болбойт.
Спирт ичимдигин ичкенге болбойт. Ажылык сапарга барарда адам жан дүйнөсүн гана эмес, организмин да тазалап спирт ичимдигинен баш тартканы оң. Ошондой эле парздан кутулуп келген ажылар кайтып келгенден кийин жаман жолдон оолак болуп, насвай, чылым чегүү өңдүү адаттарын таштап койгону дурус.
Жаман сөздөрдү айтып, сөгүнгөнгө болбойт. Ыйык жерге баргандан кийин сөгүнмөк тургай үндү катуу чыгарып сүйлөө да уят.
Талашып- тартышып, урушканга болбойт. Көпчүлүк болгон жерде бирөө бутуңду тебелеп же түртүп кетиши мүмкүн. Ошондой учурларда ачууга алдырбай, сабырдуу болууга аракет кылуу керек.
Жаш балдарга барганга болбойт. Эркек бала да, кыз бала да паспорт алгандан кийин гана ыйык милдетти аткаруусуна жол ачылат.
Аял киши жалгыз барбайт. Аялдарды жандап барган эркек адам сөзсүз болушу керек. Ал күйөөсү, атасы же инисиби, айтор, аялдын жакын адамы болууга тийиш.
Жубайлар чогуу барса кошулууга болбойт. Аял-күйөөсү ажылыкка бирге барса жыныстык катнашта болууга жол берилбейт. Себеби ислам дининде бул күнөө катары эсептелет.
Эмдөө. Сауд Аравия зыяратчыларга өз өлкөсүнөн сөзсүз менингит жана сасык тумоого каршы эмделип келүүнү буюрат. Эгер ажыга бара жаткан адамдын документинин арасында "эмделди" деген кагазы жок болсо ажылык сапардан жол жабылат.
Оорулуу адамдар баралбайт. Эгер адам ооруп жатса же илдети коркунучтуу болсо ажылык милдетин аткара албай калышы ыктымал. Анткени ден соолугу начар адам өзүн кыйнап зыярат кылбашы керек.
