Төрөтканадан ымыркайдын уурдалышы жөнүндөгү маалыматка министр эмне деди?

БИШКЕК, 5-июл. — Sputnik. Учурда комиссия иштеп жатат, биз өз кемчилигибизди жашырбайбыз. Мындай пикирин Саламаттык сактоо министри Талантбек Батыралиев Балыкчыдагы төрөтканадан ымыркайдын жоголгону тууралуу кабарга түшүндүрмө берип жатып билдирди.

Ысык-Көл облусунун тургундары Балыкчыдагы төрөтканада ымыркайдын жоголушу боюнча милицияга арыз менен кайрылышкан. Ата-эненин айтымында, дарыгерлер эгиздер төрөлөт деп күтүп жаткан түгөйлөргө бир гана ымыркайды беришкен.

Саламаттык сактоо министри Талантбек Батыралиев эгиз төрөлмөк деген кабар боюнча өзүнүн оюн билдирди.

"Энени сен эгиз төрөйсүң деп башынан айтып коюп, кийин бир эле ымыркайды бергенде анын абалын элестетип көрүңүз. Учурда комиссия иштеп жатат. Биз өз кемчилигибизди жашырбайбыз. Бул ишке тиешеси болгондордун бардыгы мыйзам алдында жооп бериши керек. Ошол эле учурда квалификацияны жогорулатуу жана лицензияны берүүнү катуулатуу зарыл", — деди Батыралиев.

Ал ошондой эле бир учурларда дарыгерлер менен соттошууну өзү да каалаганын айтып берди.

"Экинчи балам кечирээк төрөлдү. Ал үчүн биз көп убакыт бою аракет кылган элек. Жубайымдын боюнда болгондо бизге кыз болот деп айтып келишкен. Командировкага чыкканда мен кызга тиешелүү кийимдерди алып келип, аны жубайыма көргөзбөй катып койчумун. Башкалар уул төрөлсө сүйүнүшөт го, жубайым көз жарып, уул төрөгөндө мен төрөтканага чалып, силерди сотко берем дегем", — деп башынан өткөн окуяны айтып берди.

Учурда бул боюнча Ысык-Көл облустук милициясы кылмыш ишин козгоп, тергөө амалдары жүрүүдө.