БИШКЕК, 28-июн. — Sputnik. Чоң Чүй каналындагы суунун деңгээли көтөрүлүп, үйлөрдү каптады. Бул тууралуу ӨКМдин маалымат кызматынан кабарлашты.
Ведомстводон маалымдашкандай, 19-июндан бери Чүйдүн суу чарба башкармалыгы сугат иштери үчүн ЧЧКга берилген суунун көлөмүн секундуна 40 куб метрге чейин көбөйткөн.
Анын натыйжасында, Кара-Балта көчөсүндөгү №151, 151/1 жана 149 турак үйлөрүн суу каптаган.
Бул боюнча ӨКМдин Бишкектеги башкармалыгы Чүйдөгү суу чарба башкармалыгына суунун деңгээлин азайтуу боюнча кат жөнөттү.
26-июнда суунун деңгээли секундуна 32 куб метрге чейин азайтылган. Ал эми суу каптаган аймактарда жээктерди бекемдөө иштери жүргүзүлүп жатат.
Учурда Аламүдүн, Ала-Арча жана ички чарбалык каналдар дагы тыкыр көзөмөлгө алынганы белгиленди.
