БИШКЕК, 9-июн. — Sputnik. Өзгөн районундагы жер көчкүдөн жабыркаган Жалпак-Таш, Зергер, Ийри-Суу айыл аймагындагы Ничке-Сай, Аюу-Сай, Курбу-Таш айылдарынын тургундарына Кароол, Кызыл-Октябрь, Төрт-Көл айыл аймактарынан жер тилкелери бериле баштады. Бул тууралуу өкмөттүн Оштогу өкүлчүлүгүнүн маалымат катчысы Жумамидин Сулайманкулов аймактык кабарчыга билдирди.
Өкмөт өкүлү Таалайбек Сарыбашов Кызыл-Октябрь айыл аймагынын Жаман-Адыр участкасындагы жер бөлүштүрүү иш чарасына катышты. Учурда турак-жайларын жер көчкү басып калган Курбу-Таш айыл аймагындагы 67 үй-бүлө үчүн атайын чатырлар тигилип, ар бирине 8 сотыхтан жер аянты бөлүнгөн. Азыр электр энергиясын тартуу иштери жүргүзүлүп, электр мамылар орнотулууда.
Бөлүнүп берилген жерге учурунда коон, дарбыз өстүрүлгөн. Жер тилкелерин алган жарандар тез арада көчүп келип турак жай саларын айтышты. Алар өкмөт өкүлүнө коюлган талаптар убагында аткарылып суу, жарык алып келингени үчүн ыраазычылык билдирди.
Ага кошумча учурда каттап жаткан жолду кеңейтүү жана оңдоо маселесин айтышты.
Жаман-Адыр участогунун башкы планында 250 орундуу мектеп, 120 орундуу бала бакча, ФАП, мончо жана мечит сыяктуу курулуштардын орду көрсөтүлгөн.
Ал эми Төрт-Көл айыл аймагына Зергер айыл аймагынын Аюу-Сай, Ничке-Сай айылынын эли көчүп келет. Эртеңден тарта бул аймакта да жерлер бөлүштүрүлөт.
Эскерте кетсек, Аюу айылында 29-апрелде жер көчүп алты үй-бүлөдөн 24 кишини басып калган. Алты күнгө созулган издөө аракеттеринин натыйжасында көчкү алдынан сегиз адамдын сөөгү чыгарылган. Калган 16 киши ошол жерде калтырылып, айланасы тосулуп, мазар болмокчу. Ага удаа Жалпак-Таш айыл аймагындагы 61 түтүн жашаган айылда сүрүлүп жаткан жер көчкү 10-майга чейин 45 турак жайды басып калган. Кырсык чалган айылдыктар чатырларга көчүп чыккан. Ничке-Сай айылынын Топ-Жаңгак участкасында 26-март күнү таңга жуук жер көчкү жүрүп, төрт балалуу үй-бүлөнү басып калган.
