БИШКЕК, 19-май — Sputnik. Үстүбүздөгү жылдын февраль айында Ысык-Көл районунун Өрнөк айылында мечит жамаатынын демилгеси менен спирт ичимдиктерин сатуу чектелген. Анда дүкөндөрдөгү жалпы баасы 26 550 сомду түзгөн сыра, арак өңдүү спирт ичимдиктери канализациялык кудукка төгүлүп, жок кылынган.
Бирок айрымдар аталган демилге ичимдик ичкендердин аягын тыйбаганын айтып жатат. Мындан сырткары, сооданын солгундашына нааразы болгон дүкөнчүлөр да четтен чыгууда.
Аталган айылда төрт жылдан бери дүкөн иштеткен Майрамбек Акылбеков тыюу салынгандан бери жарандар коңшу айылдардан запастап ичимдик сатып ала баштаганын билдирди.
"Бизди чектегени менен коңшу айылдарда ачык эле сатылууда. Каалагандар ошол жакка барып төрт-беш шишени бир алып келип алышат дагы аны бир убакта ичип алып ого бетер мас болуп жатышат. Ичкендер ичип эле жүрөт, баары бир токтото албайт экенсиң. Мындан улам айрым дүкөндөр жашырып сатууга өтө баштады", — деди Акылбеков.
Айылдагы дагы бир дүкөн ээси Айгүл Мамбетова демилгени ишке ашыруу үчүн мындай тыюуну айыл өкмөт боюнча коюш керек экенин белгиледи.
Өрнөк айылынын башчысы Хамза Мамбеталиев бул тууралуу дүкөн ээлери арызданбаганын жана бул элдин өзүнүн чечими болгонун билдирди.
Ал эми айыл имамы Муслидин Нарматов мечит жамаатына дүкөнчүлөрдүн баары макул болуп кол коюп бергенин баса белгиледи.
"Айылда мурдагыдай уруш-тополоң, ызы-чуу жок тынч эле болуп калганы байкалып жатат. Биз чектегенден кийин ичкендер көбөйүп жатат дегендерге кошулбайм. Бул демилгени ишке ашырууга коңшу айылдар да аракет кылып, бирок натыйжа бербей калды", — деди Нарматов.
Белгилей кетсек, Өрнөк айылында 10 дүкөн бар, жалпы 240 түтүн эл жашайт.
