БИШКЕК, 16-апр. — Sputnik. Төө-Ашууда эки ирет кар көчкү түшүп Бишкек — Ош унаа жолуна убактылуу чектөө киргизилди. Бул тууралуу ӨКМден кабарлашты.
Билдирмеге карганда, Бишкек — Ош унаа жолунун 122-чакырымында бүгүн, 16-апрелде саат 10.30да кар көчкү түшүп жолду бөгөп калган. Кийинчерээк саат 12.45те ушул эле аймактын 123-чакырымында дагы кар көчкү түшкөн.
Жолду тазалоо иштерине үч техника тартылып, саат 13.30да унаалардын бир тараптуу өтүүсүнө ылайыкташкан жол ачылды.
Түзүлгөн кырдаалга байланыштуу Сосновка өткөрмө постунда унааларга чектөө киргизилди.
