"Азаттык" менен Zanoza.kg сайтынын эсеби камакка алынды

БИШКЕК, 22-мар. — Sputnik. Бишкектеги Ленин районунун соту Жылдыз Жумабаева "ПроМедиа" коомдук фонду (Zanoza.kg сайты) менен "Азаттык медианын" (azattyk.org сайты) эсебин камакка алуу чечимин чыгарды. Бул тууралуу Sputnik Кыргызстан агенттигине Zanoza.kg порталынын башкы редактору Дина Маслова билдирди.

Анын айтымында, январь айында "Ата Мекен" фракциясынын лидери Өмүрбек Текебаев эки маалымат каражатына Кипрге болгон сапары тууралуу маек берген. Текебаев президенттин бизнеси жөнүндө маалыматы бар делген адамдар менен жолукканын айткан. Мындан улам Башкы прокурор президенттин ар намысына шек келтирилгенин айтып, сотко 13 миллион сомдук доо менен кайрылган ("Азаттык" — 10 миллион, Zanoza.kg — 3 миллион).

Маслова соттун аныктамасын да жөнөткөн. Анда "эки ЖМКга таандык банктык эсептер жөнүндө маалыматтарды талап кылуу" деп жазылган.

"Азаттык медианын" атайын эсебинде каражат болсо 10 миллион сомдун чегиндеги акчаны камакка алуу керек", — деп жазылган документте.

"ПроМедиа" коомдук фондуна дагы ушундай эле чечим чыгарылган. Болгону анда үч миллион сом көрсөтүлгөн.

Аныктама чыккан күндөн тартып күчүнө кирип, арызданууга 10 күн убакыт берилгени белгиленет.

Маслова билдиргендей, банкка азырынча маалымат түшө элек. Ал мындан аркы кадамдары боюнча юристтер менен кеңеше электигин билдирди.

Башкы прокурор президенттин ар намысына шек келтирди деген доону ЖМКга гана эмес, Өмүрбек Текебаевдин адвокатына дагы коюп, анын мүлкү камакка алынган.